ជ្រលងបៃតងវាលពួច (Green Valley Veal Pouch )

ជ្រលងបៃតងវាលពួច ជាកន្លែងលំហែកាយបែបធម្មជាតិស្ថិតនៅក្បែរទឹកធ្លាក់វាលពួចដែលសម្បូរដោយរុក្ខជាតិខៀវខ្ចី អមដោយទេសភាពព្រៃភ្នំ និងជ្រលងទឹកហូរក្រោមស្ពានយោលដែលភ្ញៀវទេសចរមិនគួរមើលរំលង។

ជាមួយគ្នានេះដែរ នៅទីនោះក៏មានបន្ទប់គេងដែលរៀបចំឡើងយ៉ាងប្រណីតគួរអោយចង់ស្នាក់នៅ ព្រមទាំងមានតង់VIPដែលបំពាក់ដោយម៉ាសីុនត្រជាក់សម្រាប់គេងផងដែរ។ ក្រៅពីនេះ ជ្រលងបៃតងវាលពួច ក៏មានជាអាហារដ្ឋានដែលបម្រើសេវាកម្មម្ហូបខ្មែរ ម្ហូបបរទេស កាហ្វេ ស្រាក្រឡុក និងភេសជ្ជៈជាច្រើនមុខទៀត អមជាមួយនឹងកន្លែងអង្គុយក្បែរទឹកហូរស្ថិតក្នុងបរិយាកាសដ៏រីករាយ។ មិនតែប៉ុណ្តោះ លោកអ្នកអាចងូតទឹកលេងកម្សាន្ត ថតរូបជាមួយទេសភាពដ៏ស្រស់ស្អាត មានតាបសម្រាប់បុកប៊ីយ៉ែ ជាពិសេសលោកអ្នកក៏អាចដើរលើស្ពានយោល ជិះខ្សែរ៉ក ដើរលើបន្ទះក្តារ និងសំបកកង់ឡានដោយអារម្មណ៍រីករាយផងដែរ។

សម្រាប់អ្នកដែលស្រលាញ់ធម្មជាតិ និងចូលចិត្តភាពស្ងប់ស្ងាត់អាចអញ្ជើញមកកាន់ ជ្រលងបៃតងវាលពួចបានដែលមានទីតាំងស្ថិតនៅក្នុងភូមិទ្វីខាងជើង សង្កាត់អណ្តូងខ្មែរ ក្រុងកំពត ខេត្តកំពត ដោយយើងត្រូវធ្វើដំណើរតាមបណ្តោយផ្លូវជាតិលេខ ៣ ទិសដៅពីរង្វង់មូលទឹករលកទៅខេត្តព្រះសីហនុប្រមាណ ១.៤ គីឡូម៉ែត្រ រួចបត់ស្តាំចូលតាមច្រកវត្ដព្រះពុទ្ធជ័យមង្គលារាមហៅវត្តវាលពួចប្រហែលជិត ៥គីឡូម៉ែត្រយើងនឹងទៅដល់វត្តវាលពួច បន្ទាប់មកទៀតធ្វើដំណើរឆ្ពោះទៅកាន់ ជ្រលងបៃតងវាលពួចប្រមាណ ១គីឡូម៉ែត្រទៀត នោះលោកអ្នកនឹងបានទៅដល់ទីតាំងតែម្តង។